مسلمان Muslim

د مسلمان په اړه يې لیکوال لیکي :
په مسلمان کې تاسې روان وضعيت لولئ، زموږ ټولنه په جګړه کې ګير ده، ځينو ته دا جګړه د پرديو لاسونو ښکاري، څوک يې سپېڅلی جهاد ګڼي او څوک يې بيا پر اقتصادي ګټو د خيټې اچولو لپاره دام؛ دلته به تاسې د همدې جګړې تر تاثير لاندې ولس، په جګړه کې ښکېل دواړه لوري ولولئ، خو دا خبره مو بايد په ذهن کې وي چې په کيسه کې را اخيستل شوي کرکټرونه له ولس او د جګړې له دواړو غاړو څخه نمونه يي را اخيستل شوي، ښايي ټولنه کې او د جګړې دواړو لوريو کې د دې را اخيستل شويو کرکټرونو پر خلاف هم موجود وي، خو حالات زموږ تر مخ دي او قضاوت کولی شو.
ښايي ناول کې ستاسې د فکر برابر پېښې تنظيم شوې وي او د ناول په پای کې يو ډول ډاډ احساس کړئ او خوند در کړي مګر دا هم ممکنه ده، چې ستاسې د نظر بشپړ خلاف تنظيم شوې پېښې ووينئ و انګېرئ چې رسنۍ خو بل څه وايي مګر دې ناول کې خو نور څه روان دي؛ نو د يو ښه لوستونکي په توګه بايد د خپل نظر موافق او مخالف اړخونه دواړه مطالعه شي، د حق د موندنې لپاره هم بايد سړی هغه لوری هم مطالعه کړي چې د حق دعوه کوي او هغه هم مطالعه کړي چې دا دعوه ورسره نه مني. دلته هم ښايي تاسې د ناول په پای کې يوې پرېکړې ته ورسېږئ، که مو له ناوله خوند واخيست زما لپاره به وياړ وي او که مو ځان ورسره نا ارامه احساس کړ، وبښئ !