خاتم النبیین (ص)

(( خاتم النبیین صلی الله علیه وسلم ))

د حضرت عيسى ابن مريم علیه السلام څخه وروسته د انبياوو د نه راتګ موده اوږده شوه. د نړۍ څخه علم او رڼا کډه بار کړې وه او هر لوري ته د جهل او ناپوهۍ توره تياره خپره شوه.
د سپېڅلي توحيد او خالص دين هغه ملکوتي غږ چې هر نبي په خپل وخت کې پورته کړی ؤ د دجالانو او دروغجنو د جهل او بې لارۍ په نارو کې ورو ورو له منځه ولاړه .
د توحيد او ايمان هغه ډيوې چى د الله جل جلاله رالېږلو پيغمبرانوعلیهم السلام او د هغوى پيروانو بلې کړې وې د هغو توپانونو په څپو کې مړې شوې چې يو د بل پسې راتللې.
پخواني دينونه:
پخواني لوى دينونه چې تر ټولو آخرنى يې مسيحيت دى د هوا او هوس د بندګانو ښکار او د منحرفينو او منافقينو د لوبو ميدان وګرځېده، تر دې چې خپل ماهيت اوشکل يې له لاسه ورکړ آن تردې که چيرې د دې راوړونکي پيغمبران علیهم السلام او د هغوى پيروان بيا راژوندي شوي واى نو دا دينونه به يې نه وو پېژندلي او له قبلولو څخه به يې انکار کړى واى.
يهوديت د رسم اورواج يوه بې روحه او بې ژونده ټولګه شوه چې د نړيوالو لپاره يې نه کوم پيغام درلود، نه يې د ولسونو لپاره دعوت او نه يې د بشريت لپاره په خپله غېږه کې رحمت درلود، او مسيحيت هم د خپلو لومړيو ورځو څخه د سخت دريځو د تحريف او جاهلانو د تأويل ښکار شو او د حضرت عيسى علیه السلام رښتيني تعليمات له منځه ولاړل او د توحيد رڼا او د الله جل جلاله خالص عبادت د جهل د وريځو ترشا پټ او ورک شو.
مجوس هم د اور څخه راتاو ول او د هغه عبادت يې کاوه او د هغه لپاره يې عبادت خانې جوړولې خو د عبادت ځاى څخه د باندې آزاد او د خپلو خواهشاتو او نفساني غوښتنو تابع وو .